ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਮਹਾਨਗਰ ਜਲੰਧਰ ਵਿੱਚ ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ ਜਿਸਨੇ ਨਾਕੇ ਤੇ ਡਿਊਟੀ ਕਰ ਰਹੀ ਪੁਲਿਸ ਦੀ ਕਾਰਗੁਜ਼ਾਰੀ ਉੱਤੇ ਸਵਾਲ ਚੁੱਕ ਦਿੱਤੇ ਹਨ। ਮਾਮਲਾ ਬਬਰੀਕ ਚੌਕ ਦਾ ਹੈ ਜਿੱਥੇ ਇੱਕ ਕਾਰ ਸਵਾਰ ਵਿਅਕਤੀ ਦਾ ਪੁਲਿਸ ਨੇ “ਹੈਲਮੈਟ ਨਾ ਪਹਿਨਣ” ਦਾ ਚਾਲਾਨ ਕੱਟ ਦਿੱਤਾ।
ਦਰਅਸਲ, ਸੁਸ਼ੀਲ ਤਿਵਾਰੀ ਨਾਂ ਦਾ ਵਿਅਕਤੀ ਜੋ ਕਿ ਰਵਿਵਾਰ ਰਾਤ ਕਰੀਬ 9 ਵਜੇ 120 ਫੁੱਟੀ ਰੋਡ ‘ਤੇ ਸਥਿਤ ਬਬਰੀਕ ਚੌਕ ਦੇ ਨੇੜੇ ਤੋਂ ਆਪਣੀ ਕਾਰ ਰਾਹੀਂ ਗੁਜ਼ਰ ਰਿਹਾ ਸੀ, ਨੂੰ ਥਾਣਾ ਨੰਬਰ 5 ਦੀ ਪੁਲਿਸ ਵਲੋਂ ਲਗਾਏ ਗਏ ਨਾਕੇ ਦੌਰਾਨ ਰੋਕ ਲਿਆ ਗਿਆ। ਪੁਲਿਸ ਨੇ ਕਾਗਜ਼ਾਤ ਦੀ ਮੰਗ ਕੀਤੀ ਤਾਂ ਸੁਸ਼ੀਲ ਤਿਵਾਰੀ ਨੇ ਡੀਜੀ ਲਾਕਰ ਰਾਹੀਂ ਗੱਡੀ ਦੇ ਸਾਰੇ ਜਾਇਜ਼ ਕਾਗਜ਼ਾਤ — ਆਰ.ਸੀ, ਲਾਇਸੈਂਸ ਆਦਿ — ਏਐਸਆਈ ਬਲਬੀਰ ਸਿੰਘ ਨੂੰ ਵਿਖਾ ਦਿੱਤੇ।
ਸੁਸ਼ੀਲ ਤਿਵਾਰੀ ਦੇ ਦੱਸਣ ਮੁਤਾਬਕ, ਬਾਵਜੂਦ ਇਹ ਸਾਰੇ ਕਾਗਜ਼ਾਤ ਡਿਜੀਟਲ ਰੂਪ ਵਿੱਚ ਪੇਸ਼ ਕਰਨ ਦੇ, ਪੁਲਿਸ ਨੇ ਇਹਨਾਂ ਨੂੰ ਮੰਨਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਉਲਟੇ ਉਸਦਾ “ਹੈਲਮੈਟ ਨਾ ਪਹਿਨਣ” ਨਾਲ ਸੰਬੰਧਤ ਚਾਲਾਨ ਕੱਟ ਦਿੱਤਾ — ਹਾਲਾਂਕਿ ਉਹ ਕਾਰ ਚਲਾ ਰਿਹਾ ਸੀ, ਨਾ ਕਿ ਦੋ ਪਹੀਆ ਵਾਹਨ।
ਉਸ ਨੇ ਜਦੋਂ ਏਐਸਆਈ ਬਲਬੀਰ ਸਿੰਘ ਨੂੰ ਉੱਚ ਅਧਿਕਾਰੀਆਂ ਨਾਲ ਗੱਲ ਕਰਨ ਦੀ ਬੇਨਤੀ ਕੀਤੀ ਤਾਂ ਪੁਲਿਸ ਕਰਮੀ ਨੇ ਉਸਦੀ ਇੱਕ ਨਾ ਸੁਣੀ ਅਤੇ ਤਿੰਨ ਦੋਸ਼ਾਂ — ਹੈਲਮੈਟ, ਆਰਸੀ ਤੇ ਲਾਇਸੈਂਸ — ‘ਚ ਚਾਲਾਨ ਕੱਟ ਦਿੱਤਾ।
ਸੁਸ਼ੀਲ ਤਿਵਾਰੀ ਨੇ ਪੁਲਿਸ ਵਿਰੁੱਧ ਗੰਭੀਰ ਦੋਸ਼ ਲਾਉਂਦੇ ਹੋਏ ਕਿਹਾ ਕਿ ਇਹ ਨਵੀਂ ਤਰ੍ਹਾਂ ਦੀ ਮਨਮਰਜ਼ੀ ਹੈ ਜੋ ਆਮ ਜਨਤਾ ਨੂੰ ਤੰਗ ਕਰਨ ਦੇ ਉਦੇਸ਼ ਨਾਲ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਮਾਮਲੇ ਦੀ ਉਚੇ ਪੱਧਰ ‘ਤੇ ਜਾਂਚ ਅਤੇ ਨਿਆਂ ਦੀ ਮੰਗ ਕੀਤੀ ਹੈ।
ਇਸ ਮਾਮਲੇ ਨੇ ਕਈ ਸਵਾਲ ਖੜੇ ਕਰ ਦਿੱਤੇ ਹਨ:
ਕੀ ਡੀਜੀ ਲਾਕਰ ਰਾਹੀਂ ਵਿਖਾਏ ਕਾਗਜ਼ਾਤ ਕਾਨੂੰਨੀ ਤੌਰ ਤੇ ਵੈਧ ਨਹੀਂ ਮੰਨੇ ਜਾਂਦੇ?
ਕਾਰ ਸਵਾਰ ਤੋਂ ਹੈਲਮੈਟ ਦੀ ਉਮੀਦ ਰੱਖਣੀ ਕੀਤੇ ਤਕ ਲਾਜ਼ਮੀ ਹੈ?
ਆਮ ਲੋਕਾਂ ਨੂੰ ਅਜਿਹੀ ਮਨਮਰਜ਼ੀ ਤੋਂ ਕੌਣ ਬਚਾਵੇਗਾ?
ਇਸ ਮਾਮਲੇ ਨੇ ਪੁਲਿਸ ਦੇ ਰਵੱਈਏ ‘ਤੇ ਨਵਾਂ ਵਿਵਾਦ ਖੜਾ ਕਰ ਦਿੱਤਾ ਹੈ। ਹੁਣ ਵੇਖਣਾ ਇਹ ਹੋਵੇਗਾ ਕਿ ਉੱਚ ਅਧਿਕਾਰੀ ਜਾਂਚ ਕਰਕੇ ਕੀ ਕਾਰਵਾਈ ਕਰਦੇ ਹਨ।
