ਜਲੰਧਰ : ਅਗਸਤ ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਵੈਸਟ ਹਲਕੇ ’ਚ ਹੋਈ ਨੌਜਵਾਨ ਦੀ ਕਤਲ ਦੀ ਘਟਨਾ ਦੀ ਗੁੱਥੀ ਜਲੰਧਰ ਪੁਲਿਸ ਨੇ ਸੁਲਝਾ ਲਈ ਹੈ। ਪੁਲਿਸ ਨੇ ਇਸ ਮਾਮਲੇ ‘ਚ ਮੁਲਜ਼ਮ ਸੂਰਜ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਅਤੇ ਉਸਦੇ ਕਬਜ਼ੇ ਤੋਂ ਵਾਰਦਾਤ ਦੌਰਾਨ ਵਰਤਿਆ ਗਿਆ ਚਾਕੂ ਵੀ ਬਰਾਮਦ ਕਰ ਲਿਆ ਗਿਆ ਹੈ।
ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ 31 ਜੁਲਾਈ ਦੀ ਰਾਤ ਘਾਸ ਮੰਡੀ ਚੌਕ ਨੇੜੇ ਦਸ਼ਹਿਰਾ ਗਰਾਊਂਡ ਦੇ ਕੋਲ 22 ਸਾਲਾ ਨੌਜਵਾਨ ਰਾਹੁਲ ਦਾ ਕੁਝ ਹੋਰ ਨੌਜਵਾਨਾਂ ਨਾਲ ਝਗੜਾ ਹੋਇਆ ਸੀ। ਰਾਹੁਲ ਅਤੇ ਸੂਰਜ ਆਪਸ ਵਿੱਚ ਦੋਸਤ ਸਨ ਪਰ ਕਿਸੇ ਗੱਲ ਨੂੰ ਲੈ ਕੇ ਦੋਹਾਂ ਵਿੱਚ ਬਹਿਸਬਾਜ਼ੀ ਹੋਈ। ਇਸ ਬਾਅਦ ਦੋਹਾਂ ਵਿਚਕਾਰ ਹੱਥਾਪਾਈ ਹੋਈ ਜਿਸ ਵਿੱਚ ਹੋਰ ਨੌਜਵਾਨਾਂ ਨੇ ਵਿਚ ਆ ਕੇ ਰਾਜੀਨਾਮਾ ਕਰਵਾ ਦਿੱਤਾ।
ਜਿਵੇਂ ਹੀ ਹੋਰ ਨੌਜਵਾਨ ਥਾਂ ਛੱਡ ਕੇ ਚਲੇ ਗਏ, ਤੈਸ਼ ਵਿੱਚ ਆਏ ਸੂਰਜ ਨੇ ਅਚਾਨਕ ਆਪਣੀ ਜੇਬ ’ਚੋਂ ਚਾਕੂ ਕੱਢਿਆ ਤੇ ਰਾਹੁਲ ਉੱਤੇ ਤਾਬੜਤੋੜ 4-5 ਵਾਰ ਕੀਤੇ। ਗੰਭੀਰ ਜ਼ਖ਼ਮੀ ਰਾਹੁਲ ਨੂੰ ਉਸਦੇ ਦੋਸਤ ਤੁਰੰਤ ਸਿਵਲ ਹਸਪਤਾਲ ਲੈ ਕੇ ਗਏ ਪਰ ਢਿੱਲ ਹੋਣ ਕਰਕੇ ਰਾਹੁਲ ਦੀ ਸਵੇਰੇ ਮੌਤ ਹੋ ਗਈ।
ਰਾਹੁਲ ਦੇ ਭਰਾ ਦੇ ਬਿਆਨਾਂ ਅਧਾਰ ’ਤੇ ਪੁਲਿਸ ਨੇ ਸੂਰਜ ਖ਼ਿਲਾਫ਼ ਕਤਲ ਦਾ ਮੁਕੱਦਮਾ ਦਰਜ ਕਰ ਲਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਆਰੋਪੀ ਸੂਰਜ ਦੇ ਖ਼ਿਲਾਫ਼ ਪਹਿਲਾਂ ਕੋਈ ਇਤਿਹਾਸ ਨਹੀਂ ਮਿਲਿਆ। ਅੱਜ ਪੁਲਿਸ ਨੇ ਆਰੋਪੀ ਨੂੰ ਅਦਾਲਤ ‘ਚ ਪੇਸ਼ ਕੀਤਾ, ਜਿਥੋਂ 2 ਦਿਨਾਂ ਦਾ ਪੁਲਿਸ ਰਿਮਾਂਡ ਪ੍ਰਾਪਤ ਕੀਤਾ ਗਿਆ।
ਇਸ ਮਾਮਲੇ ‘ਚ ਹੋਰ ਨੌਜਵਾਨ ਜੋ ਸੀ.ਸੀ.ਟੀ.ਵੀ. ਫੁਟੇਜ ’ਚ ਨਜ਼ਰ ਆ ਰਹੇ ਹਨ, ਉਹ ਸਿਰਫ ਰਾਜੀਨਾਮਾ ਕਰਵਾਉਣ ਲਈ ਮੌਕੇ ’ਤੇ ਮੌਜੂਦ ਸਨ। ਪੁਲਿਸ ਹੁਣ ਆਰੋਪੀ ਸੂਰਜ ਤੋਂ ਹੋਰ ਗਵਾਹੀਆਂ ਤੇ ਵਜ੍ਹਾ ਬਾਰੇ ਪੁੱਛਗਿੱਛ ਕਰ ਰਹੀ ਹੈ।
