NSQF ਅਧਿਆਪਕਾਂ ਨੇ ਆਪਣੇ ਖੂਨ ਨਾਲ ਮੰਗਾਂ ਲਿਖ ਕੇ ਸਰਕਾਰ ਨੂੰ ਭੇਜੀਆਂ

ਪਟਿਆਲਾ – NSQF ਵੋਕੇਸ਼ਨਲ ਅਧਿਆਪਕ ਯੂਨੀਅਨ ਪੰਜਾਬ ਦੇ ਸੂਬਾ ਪ੍ਰਧਾਨ ਰਾਇ ਸਾਹਿਬ ਸਿੰਘ ਸਿੱਧੂ, ਸੂਬਾ ਮੀਤ ਪ੍ਰਧਾਨ ਨਵਨੀਤ ਕੁਮਾਰ ਅਤੇ ਸਾਥੀਆ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ NSQF ਵੋਕੇਸ਼ਨਲ ਅਧਿਆਪਕ ਪਿਛਲੇ 8 ਦਿਨਾਂ ਤੋਂ ਗੂੰਗੀ ਬੋਲੀ ਸਰਕਾਰ ਦੇ  ਕੈਪਟਨ ਅਮਰਿੰਦਰ ਸਿੰਘ ਦੇ ਸ਼ਹਿਰ ਵਿਖੇ ਆਪਣੀਆ ਮੰਗਾਂ ਨੂੰ ਲੈਕੇ ਗੁਰੂਦਵਾਰਾ ਦੁੱਖ ਨਿਵਾਰਨ ਸਾਹਿਬ ਦੇ ਸਾਹਮਣੇ ਪੱਕੇ ਧਰਨੇ ਉਤੇ ਬੈਠੇ ਹਨ। ਉਹਨਾਂ ਨੇ ਪਿਛਲੇ ਦਿਨਾਂ ਵਿਚ ਬੂਟ ਪਾਲਿਸ਼ਾਂ ਕਰ, ਸਰਕਾਰ ਦੇ ਦਿੱਤੇ ਜਾਂਦੇ ਲਾਲੀਪੋਪ ਵੰਡ ਕੇ, ਸ਼ਹਿਰ ਵਿਚ ਰੋਸ ਰੈਲੀਆਂ ਕਰ, ਚੌਕਾਂ ਵਿਚ ਖੜ ਭੀਖ ਮੰਗ ਕੇ ਸਰਕਾਰ ਦੇ ਖਜ਼ਾਨੇ ਵਿਚ ਪੈਸੇ ਜਮਾ ਕਰਵਾ ਕੇ, ਢੋਲ ਪ੍ਰਦਰਸ਼ਨ ਕੀਤੇ

NSQF ਵੋਕੇਸ਼ਨਲ ਅਧਿਆਪਕ ਅੱਜ ਆਪਣੇ ਖੂਨ ਨਾਲ ਆਪਣੀਆ ਮੰਗਾਂ ਅਤੇ  ਚਿੱਠੀ ਲਿਖ ਸਰਕਾਰ ਨੂੰ ਆਪਣੀਆ ਮੰਗਾਂ ਵੱਲ ਧਿਆਨ ਦਵਾਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ, ਸਰਕਾਰ ਦੇ  ਘਰ ਘਰ ਨੋਕਰੀ ਵਾਲੇ ਵਾਧੇ ਨੂੰ ਪੂਰਾ   ਕਰਵਾਉਣ  ਲਈ ਪਿਛਲੇ ਸੱਤ ਸਾਲਾਂ ਤੋਂ ਸਰਕਾਰੀ  ਸਕੂਲਾਂ ਵਿੱਚ ਕਿੱਤਾ ਮੁਖੀ ਕੋਰਸ ਕਰਵਾ ਕੇ ਬੱਚਿਆ ਨੂੰ ਨੋਕਰੀ ਲਗਵਾ ਰਹੇ ਹਨ। ਇਹਨਾ ਦੇ ਪੜ੍ਹਾਏ ਬੱਚੇ ਅਧਿਆਪਕਾ ਨਾਲੋ ਦੁੱਗਣੀਆਂ ਤਨਖਾਹਾਂ ਤੇ ਨੋਕਰੀ ਹਾਸਿਲ ਕਰਦੇ ਹਨ। ਪਰ  ਪੰਜਾਬ ਸਰਕਾਰ ਨੇ ਇਹਨਾ ਹੁਨਰਮੰਦ ਅਧਿਆਪਕਾਂ ਦੀ ਬਿਲਕੁਲ ਵੀ ਸਾਰ ਨਹੀਂ ਲੈ ਰਹੀ। ਵੱਡੇ ਵੱਡੇ ਕਾਰਪੋਰੇਟ ਘਰਾਣਿਆਂ ਦੇ ਲੇਬਲ ਅਧੀਨ ਭਰਤੀ ਕਰ  ਉਹਨਾ ਦੀਆ ਬਣਦੀਆਂ ਤਨਖਾਹਾਂ ਤੇ ਡਾਕਾ ਮਰਵਾਇਆ ਜਾ ਰਿਹਾ ਹੈ, ਕੋਈ ਵੀ ਮੈਡੀਕਲ ਛੁੱਟੀ ਨਹੀਂ ਦਿੱਤੀ ਜਾਂਦੀ, ਮਹਿਲਾ  ਅਧਿਆਪਕਾ ਨੂੰ ਜਣੇਪਾ ਛੁੱਟੀ ਤੋ ਵਾਂਝਾ ਰੱਖਿਆ ਜਾ ਰਿਹਾ ਹੈ। ਯੂਨੀਅਨ ਆਗੂਆਂ ਨੇ ਹੁਕਮਰਾਨ ਸਰਕਾਰ ਨੂੰ ਚਿਤਾਵਨੀ ਦਿੰਦੇ ਹੋਏ ਕਿਹਾ ਕਿ ਜੇਕਰ ਜਲਦ ਹੀ ਸਾਡੀਆਂ ਮੰਗਾਂ ਦੀ ਪੂਰਤੀ ਨਹੀਂ ਕੀਤੀ ਗਈ ਤਾਂ ਉਹ ਆਪਣਾ ਸੰਘਰਸ਼ ਹੋਰ ਤਿੱਖਾ ਕਰਨਗੇ