ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਨੇ ਪੁੱਛੇ ਪੰਜ ਸਵਾਲ, ਕਾਂਗਰਸ ਨਵਜੋਤ ਸਿੱਧੂ ਤੋਂ ਡਰਦੀ ਕਿਉਂ ਹੈ

ਚੰਡੀਗੜ੍ਹ : ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਕਾਂਗਰਸ ਦੇ ਸੂਬਾ ਇੰਚਾਰਜ ਦੇ ਵਾਅਦੇ ਪੂਰੇ ਨਾ ਕਰਨ ਵਾਲੇ ਬਿਆਨ ‘ਤੇ ਕਿਹਾ ਕਿ ਰਾਵਤ ਆਪਣੇ ਪਹਿਲਾਂ ਦਿੱਤੇ ਬਿਆਨ ਤੋਂ ਉਲਟ ਬੋਲ ਰਹੇ ਹਨ। ਰਾਵਤ ਨੇ ਮੈਨੂੰ ਮੁਲਾਕਾਤ ਤੋਂ ਬਾਅਦ ਕਿਹਾ ਸੀ ਕਿ 2017 ਦੀ ਚੋਣ ਵੇਲੇ ਜਿਹੜੇ ਵਾਅਦੇ ਕੀਤੇ ਗਏ ਸਨ, ਉਨ੍ਹਾਂ ਨੂੰ ਪੂਰਾ ਕੀਤੇ ਜਾਣ ਨਾਲ ਉਹ ਤੇ ਹਾਈ ਕਮਾਨ ਉਨ੍ਹਾਂ ਦੀ ਸਰਕਾਰ ਦੀ ਕਾਰਜ ਪ੍ਰਣਾਲੀ ਤੋਂ ਸੰਤੁਸ਼ਟ ਹਨ।

ਰਾਵਤ ਨੇ ਇਕ ਸਤੰਬਰ ਨੂੰ ਸਾਫ਼-ਸਾਫ਼ ਕਿਹਾ ਸੀ ਕਿ ਪੰਜਾਬ ਵਿਧਾਨ ਸਭਾ ਦੀਆਂ 2022 ਦੀਆਂ ਚੋਣਾਂ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ‘ਚ ਲੜੀਆਂ ਜਾਣਗੀਆਂ। ਹਾਈ ਕਮਾਨ ਦਾ ਉਨ੍ਹਾਂ ਨੂੰ ਹਟਾਉਣ ਦਾ ਕੋਈ ਇਰਾਦਾ ਨਹੀਂ ਹੈ। ਕੈਪਟਨ ਨੇ ਕਿਹਾ, ‘ਰਾਵਤ ਦੇ ਦੋਸ਼ ਸੰਕੇਤ ਰਹੇ ਹਨ ਕਿ ਪੰਜਾਬ ‘ਚ ਕਾਂਗਰਸ ਦੇ ਬੁਰੇ ਦਿਨ ਆ ਚੁੱਕੇ ਹਨ। ਮੁੱਖ ਮੰਤਰੀ ਅਹੁਦੇ ਤੋਂ ਹਟਣ ਦੇ ਤਿੰਨ ਹਫ਼ਤੇ ਪਹਿਲਾਂ ਮੈਂ ਸੋਨੀਆ ਗਾਂਧੀ ਸਾਹਮਣੇ ਅਸਤੀਫ਼ਾ ਦੇਣ ਦਾ ਪ੍ਰਸਤਾਵ ਰੱਖਿਆ ਸੀ ਪਰ ਉਨ੍ਹਾਂ ਮੈਨੂੰ ਕਿਹਾ ਕਿ ਤੁਸੀਂ ਹੀ ਮੁੱਖ ਮੰਤਰੀ ਰਹੋ। ਜਿਸ ਤਰ੍ਹਾਂ ਮੈਨੂੰ ਹਟਾਇਆ ਗਿਆ, ਉਹ ਅਪਮਾਨਜਨਕ ਸੀ। ਮੈਨੂੰ ਹਟਾਉਣ ਲਈ ਬੁਲਾਈ ਗਈ ਕਾਂਗਰਸ ਵਿਧਾਇਕ ਦਲ ਦੀ ਬੈਠਕ ਤੋਂ ਕੁਝ ਘੰਟੇ ਪਹਿਲਾਂ ਮੈਨੂੰ ਮਜਬੂਰ ਕੀਤਾ ਗਿਆ ਕਿ ਮੈਂ ਅਸਤੀਫ਼ਾ ਦੇ ਦਿਆਂ। ਮੇਰੇ ਉੱਪਰ ਜੋ-ਜੋ ਦਬਾਅ ਸਨ, ਉਹ ਕਾਂਗਰਸ ਪ੍ਰਤੀ ਵਫ਼ਾਦਾਰੀ ਦਾ ਸੀ। ਇਸੇ ਕਾਰਨ ਅਪਮਾਨ ਤੋਂ ਬਾਅਦ ਅਪਮਾਨ ਸਹਿੰਦਾ ਰਿਹਾ।’

ਕੈਪਟਨ ਦਾ ਸਵਾਲ : ਕਾਂਗਰਸ ਸਿੱਧੂ ਤੋਂ ਡਰਦੀ ਕਿਉਂ ਹੈ

1. ਸਿੱਧੂ ਨੂੰ ਇੰਟਰਨੈੱਟ ਮੀਡੀਆ ਤੇ ਹੋਰ ਜਨਤਕ ਮੰਚਾਂ ‘ਤੇ ਮੇਰੇ ਖਿਲਾਫ਼ ਬੋਲਣ ਦੀ ਇਜਾਜ਼ਤ ਕਿਉਂ ਦਿੱਤੀ ਗਈ? ਇਹ ਅਪਮਾਨ ਨਹੀਂ ਤਾਂ ਹੋਰ ਕੀ ਹੈ?

2. ਸਿੱਧੂ ਦੀ ਅਗਵਾਈ ‘ਚ ਅਸੰਤੁਸ਼ਟਾਂ ਨੂੰ ਮੇਰੇ ਅਧਿਕਾਰੀਆਂ ਨੂੰ ਚੁਣੌਤੀ ਦੇਣ ਦੀ ਛੋਟ ਕਿਉਂ ਦਿੱਤੀ ਗਈ?

3. ਪਿਛਲੇ ਸਾਢੇ ਚਾਰ ਸਾਲਾਂ ‘ਚ ਮੇਰੀ ਅਗਵਾਈ ‘ਚ ਪਾਰਟੀ ਨੇ ਜਿਹੜੀ ਜਿੱਤ ਹਾਸਲ ਕੀਤੀ, ਉਸ ਨੂੰ ਪਛਾਣਿਆ ਕਿਉਂ ਨਹੀਂ ਗਿਆ?

4. ਏਨਾ ਸਭ ਹੋਣ ਦੇ ਬਾਵਜੂਦ ਪਾਰਟੀ ਹਾਈ ਕਮਾਨ ਸਿੱਧੂ ਨੂੰ ਕਿਉਂ ਬਰਦਾਸ਼ਤ ਕਰ ਰਹੀ ਹੈ। ਉਨ੍ਹਾਂ ਨੂੰ ਮਨਮਾਨੀ ਦੀ ਛੋਟ ਕਿਉਂ ਮਿਲੀ ਹੈ?

5. ਅਜਿਹਾ ਕਿਹੜਾ ਦਬਾਅ ਹੈ ਜਿਸ ਕਾਰਨ ਪਾਰਟੀ ਹਾਈ ਕਮਾਨ ਉਨ੍ਹਾਂ ਦੇ ਸਾਹਮਣੇ ਲਾਚਾਰ ਹੈ। ਕਾਂਗਰਸ ਸਿੱਧੂ ਤੋਂ ਡਰਦੀ ਕਿਉਂ ਹੈ?