ਖ਼ਾਕੀ ਮੁੜ ਹੋਈ ਦਾਗਦਾਰ ; ਐਂਟੀ ਫਰਾਡ ਵਿੰਗ ਦਾ ਇੰਸਪੈਕਟਰ ਰਿਸ਼ਵਤ ਲੈਂਦਾ ਰੰਗੇ ਹੱਥੀਂ ਕਾਬੂ

ਬਟਾਲਾ : ਵਿਜੀਲੈਂਸ ਵਿਭਾਗ ਗੁਰਦਾਸਪੁਰ ਦੀ ਟੀਮ ਨੇ ਬਟਾਲਾ ਦੇ ਐੱਸਐੱਸਪੀ ਦਫ਼ਤਰ ਦੇ ਨਜ਼ਦੀਕ ਐਂਟੀ ਫਰਾਡ ਦਫ਼ਤਰ ਵਿਚ ਕਾਰਵਾਈ ਕਰਦਿਆਂ ਪੰਜਾਬ ਪੁਲਿਸ ਦੇ ਇੰਸਪੈਕਟਰ ਰੈਂਕ ਦੇ ਅਫ਼ਸਰ ਨੂੰ ਰਿਸ਼ਵਤ ਲੈਂਦਿਆਂ ਗ੍ਰਿਫਤਾਰ ਕੀਤਾ ਹੈ। ਇਹ ਇੰਸਪੈਕਟਰ ਰੈਂਕ ਦਾ ਮੁਲਾਜ਼ਮ ਬਟਾਲਾ ਵਿਚ ਐਂਟੀ ਫਰਾਡ ਵਿੰਗ-1 ਵਿਚ ਤਾਇਨਾਤ ਹੈ, ਨੂੰ ਡੀਐੱਸਪੀ ਵਿਜੀਲੈਂਸ ਪੇ੍ਮ ਵਰਮਾ ਦੀ ਅਗਵਾਈ ’ਚ 10 ਹਜ਼ਾਰ ਦੀ ਰਿਸ਼ਵਤ ਲੈਂਦਿਆਂ ਰੰਗੀ ਹੱਥੀਂ ਫੜਿਆ ਗਿਆ ਹੈ। ਹਾਲਾਂਕਿ ਇਸ ਸਬੰਧੀ ਡੀਐੱਸਪੀ ਵਿਜੀਲੈਂਸ ਗੁਰਦਾਸਪੁਰ ਪੇ੍ਰਮ ਵਰਮਾ ਨੇ ਕੁਝ ਵੀ ਕਹਿਣ ਤੋਂ ਇਨਕਾਰ ਕੀਤਾ ਹੈ ਪਰ ਇਸ ਗੱਲ ਦੀ ਉਨ੍ਹਾਂ ਪੁਸ਼ਟੀ ਕੀਤੀ ਹੈ ਕਿ ਇਕ ਇੰਸਪੈਕਟਰ ਨੂੰ ਰਿਸ਼ਵਤ ਦੇ ਮਾਮਲੇ ਵਿਚ ਫੜਿਆ ਹੈ।

ਮਿਲੀ ਜਾਣਕਾਰੀ ਅਨੁਸਾਰ ਐਂਟੀ ਫਰਾਡ ਵਿੰਗ ਵਿਚ ਤਾਇਨਾਤ ਸਤਿੰਦਰ ਕੁਮਾਰ ਇੰਸਪੈਕਟਰ ਨੂੰ ਸ਼ਨਿੱਚਰਵਾਰ ਸਵੇਰੇ ਮਲਕੀਤ ਸਿੰਘ ਵਾਸੀ ਵੈਰੋਨੰਗਲ ਤੋਂ 10 ਹਜ਼ਾਰ ਦੀ ਰਿਸ਼ਵਤ ਲੈਂਦਿਆਂ ਵਿਜੀਲੈਂਸ ਪੁਲਿਸ ਨੇ ਮੌਕੇ ’ਤੇ ਫੜਿਆ ਹੈ। ਜਾਣਕਾਰੀ ਮੁਤਾਬਕ ਮਲਕੀਤ ਸਿੰਘ ਨੇ ਆਪਣੇ ਨਾਲ ਹੋਈ 11 ਲੱਖ ਦੀ ਠੱਗੀ ਦੇ ਸਬੰਧ ਵਿਚ ਐਂਟੀ ਫਰਾਡ ਵਿੰਗ ਵਿਚ ਦਰਖਾਸਤ ਦੇ ਕੇ ਇਨਸਾਫ ਦੀ ਗੁਹਾਰ ਲਾਈ ਸੀ। ਉਕਤ ਕੇਸ ਇੰਸਪੈਕਟਰ ਸਤਿੰਦਰ ਕੁਮਾਰ ਹੈਂਡਲ ਕਰ ਰਹੇ ਸਨ।

ਦੱਸਿਆ ਜਾਂਦਾ ਹੈ ਕਿ ਇੰਸਪੈਕਟਰ ਸਤਿੰਦਰ ਕੁਮਾਰ ਨੇ ਉਕਤ ਮਾਮਲੇ ਵਿਚ ਅੱਗੇ ਕਾਰਵਾਈ ਕਰਨ ਲਈ ਪਹਿਲਾਂ ਤਾਂ ਮਲਕੀਤ ਸਿੰਘ ਨੂੰ ਕਾਫੀ ਖੱਜਲ ਖੁਆਰ ਕੀਤਾ ਤੇ ਫੇਰ ਪੈਸੇ ਮੰਗਣ ਲੱਗਿਆ। ਅੱਕ ਕੇ ਉਸ ਨੇ ਵਿਜੀਲੈਂਸ ਵਿਭਾਗ ਨੂੰ ਸ਼ਿਕਾਇਤ ਕੀਤੀ ਸੀ। ਸ਼ਨਿਚਰਵਾਰ ਨੂੰ ਸਵੇਰ ਸਾਰ ਹੋਈ ਇਸ ਕਾਰਵਾਈ ਨਾਲ ਬਟਾਲਾ ਐਂਟੀ ਫਰਾਡ ਦਫ਼ਤਰ ਵਿਚ ਭਾਜੜ ਪੈ ਗਈ। ਦੱਸਣਯੋਗ ਹੈ ਕਿ ਫੜਿਆ ਗਿਆ ਇੰਸਪੈਕਟਰ ਕੁਝ ਸਮਾਂ ਪਹਿਲਾਂ ਕੈਬਨਿਟ ਮੰਤਰੀ ਸੁਖਜਿੰਦਰ ਸਿੰਘ ਦੇ ਨਾਲ ਸਕਿਓਰਿਟੀ ’ਚ ਤਾਇਨਾਤ ਰਿਹਾ ਹੈ। ਐੱਸਐੱਸਪੀ ਆਫਿਸ ਵਿਜੀਲੈਂਸ ਅੰਮ੍ਰਿਤਸਰ ਵਿਚ ਇਸ ਮਾਮਲੇ ਸਬੰਧੀ ਐੱਫਆਰਆਈ ਨੰਬਰ 26 ਧਾਰਾ ਅੰਡਰ ਸੈਕਸ਼ਨ 7 ਮਾਮਲਾ ਦਰਜ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।