ਅੰਮਿ੍ਤਸਰ : ਅੰਮਿ੍ਤਸਰ ਤੋਂ ਲਗਪਗ 12 ਕਿਲੋਮੀਟਰ ਦੂਰ ਮਾਨਾਵਾਲਾ ਨੇੜੇ ਐਤਵਾਰ ਦੇਰ ਰਾਤ ਲੁਟੇਰਿਆਂ ਨੇ ਗੋਲੀਆਂ ਮਾਰ ਕੇ ਲੁਧਿਆਣੇ ਦੇ ਡਾਕਟਰ ਕੁਲਵਿੰਦਰ ਸਿੰਘ ਤੋਂ ਕਾਰ ਲੁੱਟ ਲਈ। ਘਟਨਾ ਦੇ ਸਮੇਂ ਉਨ੍ਹਾਂ ਦੀ ਪਤਨੀ ਵੀ ਨਾਲ ਸੀ। ਰਾਤ ਸਾਢੇ ਨੌਂ ਵਜੇ ਹੋਈ ਵਾਰਦਾਤ ਨੇ ਸ਼ਹਿਰ ਵਿਚ ਕਾਨੂੰਨ ਵਿਵਸਥਾ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ। ਫਿਲਹਾਲ ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਅਣਪਛਾਤੇ ਲੁਟੇਰਿਆਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਮਾਮਲੇ ਵਿਚ ਖਾਸ ਗੱਲ ਇਹ ਰਹੀ ਕਿ ਢਾਬੇ ‘ਤੇ ਮੌਜੂਦ ਇਕ ਪ੍ਰਤੱਖਦਰਸ਼ੀ ਨੇ ਸਾਰੇ ਘਟਨਾਕ੍ਰਮ ਦੀ ਵੀਡੀਓ ਬਣਾ ਕੇ ਵਾਇਰਲ ਕਰ ਦਿੱਤੀ। ਲੁਧਿਆਣਾ ਸਥਿਤ ਪੈਰਾਡਾਈਜ਼ ਆਪਟੀਕਲਜ਼ ਦੇ ਮਾਲਵਕ ਡਾ. ਕੁਲਵਿੰਦਰ ਸਿੰਘ ਐਤਵਾਰ ਨੂੰ ਪਤਨੀ ਗਗਨਦੀਪ ਕੌਰ ਨਾਲ ਪੁੱਤਰ ਡਾ. ਗੁਨਰਾਜ ਸਿੰਘ ਨੂੰ ਸ੍ਰੀ ਗੁਰੂ ਰਾਮਦਾਸ ਇੰਸਟੀਚਿਊਟ ਆਫ ਮੈਡੀਕਲ ਸਾਇੰਸਿਜ਼ ਵਿਚ ਛੱਡਣ ਅੰਮਿ੍ਤਸਰ ਆਏ ਸਨ। ਪੁੱਤਰ ਨੂੰ ਇੰਸਟੀਚਿਊਟ ‘ਚ ਛੱਡਣ ਤੋਂ ਬਾਅਦ ਡਾਕਟਰ ਪਤਨੀ ਨਾਲ ਕਾਰ ਵਿਚ ਲੁਧਿਆਣੇ ਪਰਤ ਰਹੇ ਸਨ। ਇਸੇ ਦੌਰਾਨ ਰਾਤ ਲਗਪਗ 9.30 ਵਜੇ ਮਾਨਾਵਾਲਾ ਨੇੜੇ ਦੋ ਲੁਟੇਰਿਆਂ ਨੇ ਉਨ੍ਹਾਂ ਤੋਂ ਪਿਸਤੌਲ ਦੇ ਜ਼ੋਰ ‘ਤੇ ਕਾਰ ਖੋਹਣ ਦੀ ਕੋਸ਼ਿਸ਼ ਕੀਤੀ। ਡਾ. ਕੁਲਵਿੰਦਰ ਸਿੰਘ ਨੇ ਲੁਟੇਰਿਆਂ ਨਾਲ ਭਿੜਨ ਦੀ ਕੋਸ਼ਿਸ਼ ਕੀਤੀ ਤਾਂ ਲੁਟੇਰਿਆਂ ਨੇ ਗੋਲੀ ਚਲਾ ਦਿੱਤੀ ਜੋ ਡਾਕਟਰ ਦੀ ਲੱਤ ਵਿਚ ਲੱਗੀ ਤੇ ਉਹ ਜ਼ਖਮੀ ਹੋ ੋਗਏ। ਐੱਸਐੱਸਪੀ ਦੀਪਕ ਹਿਲੋਰੀ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ ਕਰਵਾਈ ਜਾ ਰਹੀ ਹੈ।
