ਬਰਨਾਲਾ : ਬੀਤੀ ਰਾਤ ਚੰਡੀਗੜ੍ਹ ਵੱਲੋਂ ਆਉਂਦੀ ਇਕ ਰੇਂਜ ਰੋਵਰ ਕਾਰ ਨੇ ਇਕ ਸਕੂਟਰ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਤਿੰਨ ਜਣੇ ਨੂੰ ਗੰਭੀਰ ਰੂਪ ‘ਚ ਜ਼ਖ਼ਮੀ ਹੋ ਗਏ। ਭਾਵੇਂ ਡੀਐਸਪੀ (ਅੰਡਰ ਟ੍ਰੇਨਿੰਗ) ਵਿਸ਼ਵਜੀਤ ਸਿੰਘ ਮਾਨ ਨੇ ਕਾਰ ਮਾਲਕਾਂ ਦੀ ਜਾਣਕਾਰੀ ਦੇਣ ਤੋਂ ਟਾਲਮਟੋਲ ਕਰ ਦਿੱਤਾ, ਪਰ ਯੂਪੀ ਨੰਬਰ ਦੀ ਰੇਂਜ ਰੋਵਰ ਵਧੀਕ ਡਿਪਟੀ ਕਮਿਸ਼ਨਰ ਫ਼ਾਜ਼ਿਲਕਾ ਸਾਗਰ ਸੇਤੀਆ ਦੀ ਦੱਸੀ ਜਾ ਰਹੀ ਹੈ। ਮੌਕੇ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਏਡੀਸੀ ਫ਼ਾਜ਼ਿਲਕਾ ਸਾਗਰ ਸੇਤੀਆ, ਉਨ੍ਹਾਂ ਦੀ ਧਰਮ ਪਤਨੀ ਤੇ ਗੰਨਮੈਨ ਰੱਖੜੀ ਦਾ ਤਿਉਹਾਰ ਮਨਾ ਕੇ ਚੰਡੀਗੜ੍ਹ ਤੋਂ ਫਾਜ਼ਿਲਕਾ ਪਰਤ ਰਹੇ ਸਨ ਕਿ ਬਰਨਾਲਾ ਨੇੜੇ ਹਰੀਗੜ੍ਹ ਕੋਲ ਅਚਾਨਕ ਇਕ ਸਕੂਟਰ ਕੱਚੇ ਰੋਡ ‘ਤੋਂ ਜਦੋਂ ਹਾਈਵੇ ਰੋਡ ‘ਤੇ ਚੜ੍ਹਿਆ ਤਾਂ ਰੇਂਜ ਰੋਵਰ ਪਿੱਛੋਂ ਦੀ ਉਨ੍ਹਾਂ ‘ਚ ਜਾ ਟਕਰਾਈ। ਸਕੂਟਰ ‘ਤੇ ਤਿੰਨ ਵਿਅਕਤੀ ਸਵਾਰ ਸਨ, ਜੋ ਕਿ ਪਿੰਡ ਫਰਵਾਹੀ ਤੋਂ ਮਜ਼ਦੂਰੀ ਆਦਿ ਦਾ ਕੰਮ ਕਰਕੇ ਵਾਪਸ ਪਿੰਡ ਭੂਰੇ ਕੁੱਬੇ ਪਰਤ ਰਹੇ ਸਨ। ਹਾਦਸੇ ‘ਚ ਸਕੂਟਰ ‘ਤੇ ਸਵਾਰ ਪਰਗਟ ਸਿੰਘ, ਅੰਮ੍ਰਿਤਪਾਲ ਸਿੰਘ ਪੁੱਤਰ ਅਮਰੀਕ ਸਿੰਘ ਤੇ ਵੀਰਪਾਲ ਕੌਰ ਪਤਨੀ ਮਿੱਠੂ ਗੰਭੀਰ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਬਰਨਾਲਾ ਲਿਆਂਦਾ ਗਿਆ। ਇਸ ਸਬੰਧੀ ਸਿਵਲ ਹਸਪਤਾਲ ਬਰਨਾਲਾ ‘ਚ ਮੌਕੇ ‘ਤੇ ਹਾਜ਼ਰ ਡਾਕਟਰ ਸਮਾਇਲੀ ਨੇ ਦੱਸਿਆ ਕਿ ਹਾਦਸੇ ‘ਚ ਤਿੰਨੋਂ ਜਣੇ ਗੰਭੀਰ ਜ਼ਖ਼ਮੀ ਹੋ ਗਏ ਹਨ, ਜਿਨ੍ਹਾਂ ਨੂੰ ਪੀਜੀਆਈ ਚੰਡੀਗੜ੍ਹ ਰੈਫਰ ਕੀਤਾ ਗਿਆ ਹੈ।
