ਪੱਟੀ : ਪੱਟੀ ਨੇੜੇ ਇਕ ਪੈਲਸ ‘ਚ ਵਿਆਹ ਸਮਾਗਮ ਵੇਖ ਕੇ ਬਾਹਰ ਆ ਰਹੇ ਵਿਅਕਤੀਆਂ ‘ਤੇ ਕੁਝ ਲੋਕਾਂ ਵੱਲੋਂ ਗੋਲੀਆਂ ਚਲਾਈਆਂ ਗਈਆਂ।ਮਾਮਲਾ ਰੰਜਿਸ਼ ਦਾ ਦੱਸਿਆ ਜਾ ਰਿਹਾ ਹੈ। ਇਸ ਘਟਨਾ ਵਿਚ ਚਾਰ ਵਿਅਕਤੀਆਂ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਹੈ।
ਇਸ ਮੌਕੇ ‘ਤੇ ਪੱਟੀ ਸਿਟੀ ਪੁਲਿਸ ਨੇ ਪੁੱਜ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਮੌਕੇ ‘ਤੇ ਇਕੱਤਰ ਲੋਕਾਂ ਮੁਤਾਬਕ ਰਾਜਨ ਬਜਾਜ ਪੁੱਤਰ ਰਜਿੰਦਰ ਕੁਮਾਰ, ਕਿਸ਼ਨ ਲਾਲ ਪੁੱਤਰ ਮੋਤੀ ਰਾਮ ਚਾਵਲਾ ਦਾ ਰਾਜਬੀਰ ਸਿੰਘ ਪੁੱਤਰ ਸੇਵਾ ਅਤੇ ਵਿਸ਼ਾਲ ਕੁਮਾਰ ਪੁੱਤਰ ਤਿਲਕ ਰਾਜ ਨਾਲ ਝਗੜਾ ਸੀ, ਪੈਲਸ ਦੇ ਬਾਹਰ ਦੋਵਾਂ ਦਰਮਿਆਨ 10-12 ਗੋਲੀਆਂ ਚੱਲੀਆਂ ਤਾਂ ਚਾਰੇ ਵਿਅਕਤੀ ਜਖ਼ਮੀ ਹੋ ਗਏ, ਜਿਨਾਂ੍ਹ ਨੂੰ ਹਸਪਤਾਲ ਭੇਜ ਦਿੱਤਾ ਗਿਆ। ਸਿਵਲ ਹਸਪਤਾਲ ਪੱਟੀ ਵਿਖੇ ਜਖ਼ਮੀ ਵਿਸ਼ਾਲ ਕੁਮਾਰ ਨੇ ਦੱਸਿਆ ਕਿ ਉਹ ਆਪਣੇ ਦੋਸਤ ਰਾਜ ਨਾਲ ਵਿਆਹ ਸਮਾਗਮ ‘ਚ ਗਿਆ ਸੀ ਤਾਂ ਅੱਗੋਂ ਦੂਜੇ ਵਿਅਕਤੀਆਂ ਨੇ ਗੋਲੀਆਂ ਚਲਾ ਕੇ ਉਸ ਨੂੰ ਜ਼ਖਮੀ ਕਰ ਦਿੱਤਾ। ਉਸ ਨੇ ਦੱਸਿਆ ਕਿ ਉਨਾਂ੍ਹ ਕੋਲ ਪਿਸਟਲ ਤੇ ਰਿਵਾਲਵਰ ਸਨ। ਡੀਐੱਸਪੀ ਕੁਲਜਿੰਦਰ ਸਿੰਘ ਪੱਟੀ ਨੇ ਸਿਵਲ ਹਸਪਤਾਲ ਵਿਖੇ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਪੀੜਤ ਗਰੈਂਡ ਕੈਰੋਂ ਪੈਲਸ ਵਿਚ ਕੁਲਦੀਪ ਸਿੰਘ ਆੜ੍ਹਤੀਆ ਭਿੱਖੀਵਿੰਡ ਦੀ ਲੜਕੀ ਦੇ ਵਿਆਹ ਪੋ੍ਗਰਾਮ ‘ਚ ਸ਼ਾਮਲ ਹੋ ਕੇ ਬਾਹਰ ਆ ਰਹੇ ਸਨ ਤਾਂ ਪਹਿਲਾਂ ਤੋਂ ਹੀ ਬਾਹਰ ਖੜ੍ਹੇ ਕੁਝ ਵਿਅਕਤੀਆਂ ਨੇ ਪੈਲਸ ਦੇ ਬਾਹਰ ਸਿੱਧੀਆਂ ਗੋਲੀਆਂ ਚਲਾ ਦਿੱਤੀਆ। ਦੋਵੇਂ ਜਖ਼ਮੀ ਹੋਏ ਵਿਅਕਤੀਆਂ ਨੂੰ ਅੰਮਿ੍ਤਸਰ ਰੈਫਰ ਕਰ ਦਿੱਤਾ ਗਿਆ ਹੈ। ਉਨਾਂ੍ਹ ਦੱਸਿਆ ਕਿ ਜ਼ਖ਼ਮੀ ਵਿਅਕਤੀ ਭਿੱਖੀਵਿੰਡ ਏਰੀਏ ਨਾਲ ਸਬੰਧਤ ਦੱਸੇ ਜਾ ਰਹੇ ਹਨ। ਉਨਾਂ੍ਹ ਦੱਸਿਆ ਕਿ ਪੁਲਿਸ ਵੱਲੋਂ ਜ਼ਖ਼ਮੀ ਵਿਅਕਤੀਆਂ ਦੇ ਬਿਆਨ ਲੈਣ ਲਈ ਪੁਲਿਸ ਟੀਮ ਨੂੰ ਭੇਜ ਦਿੱਤਾ ਗਿਆ ਹੈ। ਥਾਣਾ ਮੁਖੀ ਲਖਬੀਰ ਸਿੰਘ ਦਾ ਕਹਿਣਾ ਹੈ ਕਿ ਅਜੇ ਕਿਸੇ ਵਿਅਕਤੀ ਨੇ ਪੁਲਿਸ ਨੂੰ ਬਿਆਨ ਦਰਜ ਨਹੀਂ ਕਰਵਾਏ। ਬਿਆਨਾਂ ਤੋਂ ਬਾਅਦ ਹੀ ਪੁਲਿਸ ਵੱਲੋਂ ਮਾਮਲਾ ਦਰਜ ਕੀਤਾ ਜਾਵੇਗਾ।
