ਚੰਡੀਗੜ੍ਹ: ਪੰਜਾਬ ਸਰਕਾਰ ਨੇ ਮੰਗਲਵਾਰ ਨੂੰ ਸੱਤ ਜ਼ਿਲ੍ਹਿਆਂ ’ਚ ਨਵੇਂ ਡਿਪਟੀ ਕਮਿਸ਼ਨਰ (ਡੀਸੀ) ਲਾਏ ਹਨ ਤੇ ਨੌਂ ਆਈਪੀਐੱਸ ਅਧਿਕਾਰੀਆਂ ਦਾ ਤਬਾਦਲਾ ਕਰ ਦਿੱਤਾ ਹੈ। ਨਵੇਂ ਡੀਸੀਜ਼ ’ਚ ਆਈਏਐੱਸ ਵਿਨੀਤ ਕੁਮਾਰ ਨੂੰ ਸ੍ਰੀ ਮੁਕਤਸਰ ਸਾਹਿਬ, ਸੁਰਭੀ ਮਲਿਕ ਨੂੰ ਲੁਧਿਆਣਾ, ਵਿਸ਼ੇਸ਼ ਸਾਰੰਗਲ ਨੂੰ ਕਪੂਰਥਲਾ, ਨਵਜੋਤ ਪਾਲ ਸਿੰਘ ਰੰਧਾਵਾ ਨੂੰ ਨਵਾਂਸ਼ਹਿਰ, ਪਰਨੀਤ ਸ਼ੇਰਗਿੱਲ ਨੂੰ ਫ਼ਤਹਿਗਡ਼੍ਹ ਸਾਹਿਬ, ਅੰਮ੍ਰਿਤ ਸਿੰਘ ਨੂੰ ਫਿਰੋਜ਼ਪੁਰ ਤੇ ਮੋਨਿਸ਼ ਕੁਮਾਰ ਨੂੰ ਤਰਨਤਾਰਨ ਦਾ ਡਿਪਟੀ ਕਮਿਸ਼ਨਰ ਲਾਇਆ ਗਿਆ ਹੈ। ਏਸੇ ਤਰ੍ਹਾਂ ਬਦਲੇ ਗਏ ਨੌਂ ਆਈਪੀਐੱਸ ਅਧਿਕਾਰੀਆਂ ’ਚ ਦੋ ਆਈਪੀਐੱਸ ਅਧਿਕਾਰੀ ਅਜਿਹੇ ਹਨ ਜਿਨ੍ਹਾਂ ਨੂੰ ਤਿੰਨ ਮਹੀਨਿਆਂ ਬਾਅਦ ਪੋਸਟਿੰਗ ਦਿੱਤੀ ਗਈ ਹੈ। ਆਈਪੀਐੱਸ ਅਧਿਕਾਰੀ ਐੱਸਕੇ ਅਸਥਾਨਾ ਨੂੰ ਏਡੀਜੀਪੀ ਪਾਲਿਸੀ ਤੇ ਰੂਲਜ਼ ਦਾ ਚਾਰਜ ਦਿੱਤਾ ਗਿਆ ਹੈ। ਚੇਤੇ ਰਹੇ ਕਿ ਡਰੱਗਜ਼ ਮਾਮਲੇ ਦੀ ਰਿਪੋਰਟ ਲੀਕ ਹੋ ਜਾਣ ਬਾਅਦ ਤੋਂ ਅਸਥਾਨਾ ਕੋਲ ਕੋਈ ਚਾਰਜ ਨਹੀਂ ਸੀ। ਏਸੇ ਤਰ੍ਹਾਂ ਆਈਪੀਐੱਸ ਅਧਿਕਾਰੀ ਗੁਰਿੰਦਰ ਸਿੰਘ ਢਿੱਲੋਂ ਨੂੰ ਆਈਜੀ ਏਟੀਐੱਫ ਪੰਜਾਬ ਲਾਇਆ ਗਿਆ ਹੈ। ਢਿੱਲੋਂ ਨੂੰ ਵੀ ਤਿੰਨ ਮਹੀਨਿਆਂ ਬਾਅਦ ਚਾਰਜ ਮਿਲਿਆ ਹੈ। ਸਰਕਾਰ ਵੱਲੋਂ ਜਾਰੀ ਕੀਤੇ ਗਏ ਬਦਲੀ ਦੇ ਹੁਕਮਾਂ ਮੁਤਾਬਕ ਆਈਪੀਐੱਸ ਗੌਰਵ ਯਾਦਵ ਤੋਂ ਏਡੀਜੀਪੀ ਆਧੁਨਿਕੀਕਰਨ ਦਾ ਚਾਰਜ ਵਾਪਸ ਲੈ ਲਿਆ ਗਿਆ ਹੈ। ਹੁਣ ਉਨ੍ਹਾਂ ਕੋਲ ਏਡੀਜੀਪੀ ਪ੍ਰਸ਼ਾਸਨਿਕ ਤੇ ਵਿਸ਼ੇਸ਼ ਮੁੱਖ ਸਕੱਤਰ ਸੀਐੱਮ ਦਾ ਚਾਰਜ ਰਹੇਗਾ। ਆਈਪੀਐੱਸ ਅਧਿਕਾਰੀ ਬੀਕੇ ਉੱਪਲ ਨੂੰ ਸਪੈਸ਼ਲ ਡੀਜੀਪੀ ਇਨਵੈਸਟੀਗੇਸ਼ਨ ਲੋਕਪਾਲ, ਗੁਰਪ੍ਰੀਤ ਦਿਓ ਨੂੰ ਕਮਿਊਨਿਟੀ ਅਫੇਅਰ ਡਵੀਜ਼ਨ ਤੇ ਔਰਤਾਂ ਦੇ ਮਾਮਲਿਆਂ ਦਾ ਚਾਰਜ ਦਿੱਤਾ ਗਿਆ ਹੈ। ਜਤਿੰਦਰ ਕੁਮਾਰ ਜੈਨ ਨੂੰ ਏਡੀਜੀਪੀ ਪੀਐੱਸਪੀਸੀਐੱਲ ਪੰਜਾਬ, ਪ੍ਰਵੀਨ ਕੁਮਾਰ ਸਿਨਹਾ ਤੇ ਜੀ ਨਾਗੇਸ਼ਵਰ ਰਾਓ ਏਡੀਜੀਪੀ ਪੰਜਾਬ ਰਾਜ ਮਨੁੱਖੀ ਅਧਿਕਾਰ ਕਮਿਸ਼ਨ ਲਾਇਆ ਗਿਆ ਹੈ। ਆਰਕੇ ਜੈਸਵਾਲ ਨੂੰ ਆਈਜੀਪੀ ਸਾਈਬਰ ਕ੍ਰਾਈਮ ਦਾ ਚਾਰਜ ਦਿੱਤਾ ਗਿਆ ਹੈ।
