ਬਟਾਲਾ : ਬਟਾਲਾ ਦੇ ਪਿੰਡ ਧੀਰਾ ‘ਚ ਡਿਪੂ ਹੋਲਡਰ ਨੇ ਔਰਤ ਅਤੇ ਉਸ ਦੇ ਦੋ ਪੁੱਤਰਾਂ ਖ਼ਿਲਾਫ਼ ਕਣਕ ਲੈਣ ਆਈਆਂ ਔਰਤਾਂ ਦੀ ਕੁੱਟਮਾਰ ਕਰਨ ਤੇ ਧਮਕਾਉਣ ਲਈ ਹਵਾ ‘ਚ ਗੋਲੀਆਂ ਚਲਾਉਣ ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ ਹੈ। ਪੁਲਿਸ ਨੇ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਕੇ ਤੀਜੇ ਫਰਾਰ ਮੁਲਜ਼ਮ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ‘ਚ ਸੁਖਵਿੰਦਰ ਕੌਰ ਵਾਸੀ ਪਿੰਡ ਧੀਰਾ ਨੇ ਦੱਸਿਆ ਕਿ ਉਸ ਦੇ ਪਿੰਡ ਦਾ ਸਰਕਾਰੀ ਡਿਪੂ ਰਾਜਵੰਤ ਕੌਰ ਦੇ ਨਾਂ ’ਤੇ ਹੈ। ਸਰਕਾਰ ਵੱਲੋਂ ਡਿਪੂ ਨੂੰ ਲੋੜਵੰਦਾਂ ਨੂੰ ਸਸਤੀ ਕਣਕ ਵੰਡਣ ਲਈ ਭੇਜੀ ਗਈ ਹੈ, ਜਿਸ ਲਈ ਸੁਖਵਿੰਦਰ ਕੌਰ ਹੋਰ ਔਰਤਾਂ ਸਮੇਤ ਡਿਪੂ ‘ਤੇ ਕਣਕ ਲੈਣ ਲਈ ਗਈ ਹੋਈ ਸੀ।
ਉੱਥੇ ਕਾਫੀ ਭੀੜ ਸੀ ਅਤੇ ਰਜਵੰਤ ਕੌਰ ਅਤੇ ਉਸ ਦਾ ਲੜਕਾ ਗੁਰਜਾਪ ਕਣਕ ਤੋਲ ਕੇ ਲੋਕਾਂ ਨੂੰ ਦੇ ਰਹੇ ਸਨ। ਪਰ ਰਜਵੰਤ ਕੌਰ ਕਣਕ ਘੱਟ ਤੋਲ ਰਹੀ ਸੀ, ਜਿਸ ‘ਤੇ ਔਰਤਾਂ ਨੇ ਇਤਰਾਜ਼ ਕੀਤਾ ਤਾਂ ਦੋਸ਼ੀ ਰਜਵੰਤ ਅਤੇ ਉਸ ਦੇ ਲੜਕੇ ਗੁਰਜਾਪ ਨੇ ਕਿਹਾ ਕਿ ਜੇਕਰ ਤੁਸੀਂ ਕਣਕ ਲੈਣੀ ਹੈ ਤਾਂ ਲੈ ਜਾਓ ਨਹੀਂ ਤਾਂ ਚਲੇ ਜਾਓ। ਇਸ ਦੌਰਾਨ ਔਰਤਾਂ ਅਤੇ ਡਿਪੂ ਹੋਲਡਰ ਤੇ ਉਸ ਦੇ ਲੜਕੇ ਵਿਚਕਾਰ ਹੱਥੋਪਾਈ ਹੋ ਗਈ। ਇਸ ਦੌਰਾਨ ਮੁਲਜ਼ਮ ਰਜਵੰਤ ਕੌਰ ਤੇ ਉਸ ਦੇ ਲੜਕੇ ਗੁਰਜਾਪ ਨੇ ਸੁਖਵਿੰਦਰ ਕੌਰ ਅਤੇ ਹੋਰ ਔਰਤਾਂ ਦੀ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ। ਇਸੇ ਦੌਰਾਨ ਮੁਲਜ਼ਮ ਰਜਵੰਤ ਕੌਰ ਦਾ ਵੱਡਾ ਲੜਕਾ ਮਨਦੀਪ ਸਿੰਘ ਉਥੇ ਆਇਆ ਤੇ ਆਪਣੇ ਲਾਇਸੰਸੀ ਰਿਵਾਲਵਰ ਨਾਲ ਹਵਾ ਵਿੱਚ ਫਾਇਰ ਕਰ ਦਿੱਤਾ।
ਥਾਣਾ ਸਦਰ ਦੇ ਏਐਸਆਈ ਗੁਰਮੁੱਖ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮ ਰਜਵੰਤ ਕੌਰ, ਗੁਰਜਾਪ ਤੇ ਮਨਦੀਪ ਸਿੰਘ ਖ਼ਿਲਾਫ਼ ਕੇਸ ਦਰਜ ਕਰਕੇ ਇਕ ਰਿਵਾਲਵਰ .32 ਬੋਰ ਅਤੇ ਇੱਕ ਖਾਲੀ ਖੋਲ ਬਰਾਮਦ ਕਰ ਲਿਆ ਗਿਆ ਹੈ। ਜਦਕਿ ਪੁਲਿਸ ਨੇ ਮਨਦੀਪ ਸਿੰਘ ਅਤੇ ਗੁਰਜਾਪ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਪੁਲਿਸ ਤੀਜੇ ਮੁਲਜ਼ਮ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਕਰ ਰਹੀ ਹੈ।
