ਇਤਿਹਾਸ ਪ੍ਰੇਮੀ ਨੌਜਵਾਨ ਨੇ ਸਿੱਖ ਇਤਿਹਾਸ ਪੜ੍ਹਨ ਲਈ ਫ਼ਾਰਸੀ ਭਾਸ਼ਾ ਦਾ ਕੀਤਾ ਡਿਪਲੋਮਾ

ਬਰਨਾਲਾ : ਸੂਬੇ ਦੇ ਨੌਜਵਾਨਾਂ ਵਿਚ ਅੰਗਰੇਜ਼ੀ ਭਾਸ਼ਾ ਲਈ ਆਇਲਟਸ ਕੋਰਸ ਕਰਨ ਦਾ ਰੁਝਾਨ ਜ਼ੋਰਾਂ ’ਤੇ ਹੈ ਪਰ ਇਤਿਹਾਸ ਪ੍ਰੇਮੀ ਨੌਜਵਾਨ ਨੇ ਫ਼ਾਰਸੀ ਜ਼ੁਬਾਨ ਨਾਲ ਮੋਹ ਵਿਖਾਇਆ ਹੈ। ਸਥਾਨਕ ਪਿੰਡ ਚੀਮਾ ਵਾਸੀ ਨੌਜਵਾਨ ਨੇ ਸਿੱਖ ਇਤਿਹਾਸ ਪੜ੍ਹਨ/ਜਾਨਣ ਦੀ ਖ਼ਾਹਿਸ਼ ਪੂਰੀ ਕਰਨ ਲਈ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਬਾਕਾਇਦਾ ਫ਼ਾਰਸੀ ਭਾਸ਼ਾ ਦਾ ਡਿਪਲੋਮਾ ਕੀਤਾ ਹੈ।

ਇਸ ਬਾਰੇ 42 ਸਾਲਾ ਜਗਸੀਰ ਸਿੰਘ ਨੇ ਦੱਸਿਆ ਕਿ ਉਹ ਹਿੰਦੂ ਪਰਿਵਾਰ ਨਾਲ ਸਬੰਧਤ ਹੈ ਪਰ ਉਹ ਪੰਜਾਬੀ ਤੇ ਸਿੱਖ ਸਾਹਿਤ ਨਾਲ ਲੰਬੇ ਸਮੇਂ ਤੋਂ ਜੁੜਿਆ ਹੋਇਆ ਹੈ। ਸਿੱਖ ਇਤਿਹਾਸ ਦਾ ਵੱਡਾ ਹਿੱਸਾ ਅਤੇ ਵਿਸ਼ੇਸ਼ਕਰ ਗੁਰੂ ਗੋਬਿੰਦ ਸਿੰਘ ਜੀ ਮਹਾਰਾਜ ਦੀਆਂ ਲਿਖਤਾਂ, ਫ਼ਾਰਸੀ ਜ਼ੁਬਾਨ ਵਿਚ ਹਨ। ਬਹੁਤੇ ਪੁਰਾਤਨ ਫ਼ਾਰਸੀ ਤੇ ਉਰਦੂ ਸਾਹਿਤ ਦਾ ਪੰਜਾਬੀ ਵਿਚ ਤਰਜਮਾ ਨਹੀਂ ਹੋਇਆ ਹੈ। ਇਹ ਸਭ ਪੜ੍ਹਨ ਲਈ ਫ਼ਾਰਸੀ ਜ਼ੁਬਾਨ ਦੀ ਜਾਣਕਾਰੀ ਨਿਹਾਇਤ ਜ਼ਰੂਰੀ ਸੀ। ਮਹਾਰਾਜਾ ਰਣਜੀਤ ਸਿੰਘ ਦੇ ਰਾਜ ਵੇਲੇ ਇਸ ਭਾਸ਼ਾ ਨੂੰ ਰਾਜ ਭਾਸ਼ਾ (ਹਕੂਮਤੀ ਜ਼ੁਬਾਨ) ਦਾ ਮਾਣ ਹਾਸਲ ਸੀ। ਇਹ ਭਾਸ਼ਾ ਸਿੱਖਣ ਲਈ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਫ਼ਾਰਸੀ ਭਾਸ਼ਾ ਦਾ ਡਿਪਲੋਮਾ ਕਰਨ ਤੋਂ ਇਲਾਵਾ ਗ੍ਰੈਜੂਏਸ਼ਨ ਪੂਰੀ ਕੀਤੀ ਹੈ। ਉਸ ਦੀ ਐੱਮਏ ਇਤਿਹਾਸ ਦੀ ਪੜ੍ਹਾਈ ਜਾਰੀ ਹੈ। ਉਸ ਦੀ ਇੱਛਾ ਸੂਫ਼ੀ ਸਾਹਿਤ ਪੜ੍ਹਣ ਦੀ ਹੈ। ਹੁਣ ਤਕ ਉਹ ਅਕਬਰਨਾਮਾ, ਜ਼ਫ਼ਰਨਾਮਾ ਸਣੇ ਹੋਰ ਫ਼ਾਰਸੀ ਸਾਹਿਤ ਨੂੰ ਪੜ੍ਹ ਚੁੱਕਿਆ ਹੈ।

ਉਸ ਨੇ ਪਤੇ ਦੀ ਗੱਲ ਕਰਦਿਆਂ ਕਿਹਾ ਕਿ ਫ਼ਾਰਸੀ ਭਾਸ਼ਾ ਸਿਖਾਉਣ ਦਾ ਕੰਮ ਸਿੱਖਾਂ ਦੀ ਸਿਰਮੌਰ ਸੰਸਥਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਕਰਨਾ ਚਾਹੀਦਾ ਸੀ ਪਰ ਅਫ਼ਸੋਸ ਇਹ ਸੰਸਥਾ ਅਜਿਹੇ ਯਤਨ ਨਹੀਂ ਕਰ ਸਕੀ। ਜਗਸੀਰ ਨੇ ਸਿੱਖ ਚਿੰਤਕਾਂ ਨੂੰ ਅਪੀਲ ਕੀਤੀ ਕਿ ਫ਼ਾਰਸੀ ਭਾਸ਼ਾ ਸਿੱਖਣ/ਸਿਖਾਉਣ ਲਈ ਯਤਨ ਕੀਤੇ ਜਾਣ।