ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਫਿੱਲੌਰ ਦੇ ਮੋਹੱਲਾ ਭੰਡੇਰਾ ਵਿੱਚ ਉਸ ਸਮੇਂ ਹੰਗਾਮਾ ਮਚ ਗਿਆ ਜਦੋਂ ਇੱਕ ਨੌਜਵਾਨ ਮਹੰਤ ਨਗਨ ਅਵਸਥਾ ਵਿੱਚ ਗਲੀ ਵਿੱਚ ਘੁੰਮਣ ਲੱਗ ਪਿਆ। ਮੋਹੱਲੇ ਦੇ ਲੋਕਾਂ ਨੇ ਪਹਿਲਾਂ ਉਸਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਜਦੋਂ ਉਸ ਨੇ ਕਿਸੇ ਦੀ ਨਾ ਸੁਣੀ ਤਾਂ ਲੋਕ ਇਕੱਠੇ ਹੋ ਕੇ ਫਿੱਲੌਰ ਥਾਣੇ ਪਹੁੰਚ ਗਏ ਅਤੇ ਪੁਲਿਸ ਨੂੰ ਇਸ ਘਟਨਾ ਬਾਰੇ ਜਾਣਕਾਰੀ ਦਿੱਤੀ।
ਮੋਹੱਲਾ ਨਿਵਾਸੀਆਂ ਨੇ ਦੱਸਿਆ ਕਿ ਇਹ ਨੌਜਵਾਨ ਆਕਾਸ਼ ਪੁੱਤਰ ਜੀਵਨ ਕੁਮਾਰ, ਜੋ ਮੋਹੱਲਾ ਭੰਡੇਰਾ ਦਾ ਹੀ ਰਹਿਣ ਵਾਲਾ ਹੈ, ਹੁਣ ਆਪਣੇ ਆਪ ਨੂੰ ਅਲੀਸ਼ਾ ਮਹੰਤ ਕਹਿੰਦਾ ਹੈ। ਅੱਜ ਉਸ ਨੇ ਹੱਦ ਪਾਰ ਕਰਦਿਆਂ ਪੂਰੀ ਤਰ੍ਹਾਂ ਨਗਨ ਹੋ ਕੇ ਗਲੀ ਵਿੱਚ ਟਹਿਲਣਾ ਸ਼ੁਰੂ ਕਰ ਦਿੱਤਾ।
ਲੋਕਾਂ ਨੇ ਕਿਹਾ ਕਿ ਮੋਹੱਲੇ ਵਿੱਚ ਇੱਕ ਮਹਿਲਾ ਦੀ ਮੌਤ ਹੋਈ ਸੀ, ਜਿਸ ਕਾਰਨ ਰਿਸ਼ਤੇਦਾਰ ਤੇ ਜਾਣ-ਪਛਾਣ ਵਾਲੇ ਦੁਖ ਪ੍ਰਗਟ ਕਰਨ ਆ ਰਹੇ ਸਨ। ਇਸ ਦੌਰਾਨ ਅਲੀਸ਼ਾ ਦੀ ਇਹ ਹਰਕਤ ਲੋਕਾਂ ਨੂੰ ਬਹੁਤ ਅਣੁਚਿਤ ਲੱਗੀ।
ਮੋਹੱਲੇ ਦੇ ਰਹਿਣ ਵਾਲਿਆਂ ਨੇ ਫਿੱਲੌਰ ਥਾਣੇ ਵਿੱਚ ਲਿਖਤੀ ਸ਼ਿਕਾਇਤ ਦੇ ਕੇ ਮੰਗ ਕੀਤੀ ਹੈ ਕਿ ਅਲੀਸ਼ਾ ਮਹੰਤ ਦੇ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ ਤੇ ਉਸਨੂੰ ਮੋਹੱਲੇ ਤੋਂ ਬਾਹਰ ਕੱਢਿਆ ਜਾਵੇ, ਕਿਉਂਕਿ ਉਸਦੇ ਵਿਹਾਰ ਨਾਲ ਬੱਚਿਆਂ ਅਤੇ ਨੌਜਵਾਨਾਂ ‘ਤੇ ਬੁਰਾ ਅਸਰ ਪੈ ਰਿਹਾ ਹੈ। ਉਹ ਅਕਸਰ ਭੜਕੀਲੇ ਕੱਪੜੇ ਪਾ ਕੇ ਗਲੀਆਂ ਵਿੱਚ ਘੁੰਮਦੀ ਰਹਿੰਦੀ ਹੈ ਜਿਸ ਨਾਲ ਮਾਹੌਲ ਖਰਾਬ ਹੁੰਦਾ ਹੈ।
ਦੂਜੇ ਪਾਸੇ, ਜਦੋਂ ਮੀਡੀਆ ਨੇ ਅਲੀਸ਼ਾ ਮਹੰਤ ਨਾਲ ਗੱਲਬਾਤ ਕੀਤੀ ਤਾਂ ਉਸ ਨੇ ਦੱਸਿਆ ਕਿ ਮੋਹੱਲੇ ਦੇ ਕੁਝ ਲੜਕੇ ਉਸਨੂੰ ਅਕਸਰ ਤੰਗ ਕਰਦੇ ਹਨ ਅਤੇ ਉਸ ਦੀਆਂ ਭੈਣਾਂ ਬਾਰੇ ਵੀ ਅਪਮਾਨਜਨਕ ਸ਼ਬਦ ਵਰਤਦੇ ਹਨ। ਉਸ ਨੇ ਕਿਹਾ ਕਿ,
> “ਮੈਂ ਤੰਗ ਆ ਕੇ ਹੀ ਇਹ ਕਦਮ ਚੁੱਕਿਆ ਸੀ। ਜੇ ਕਿਸੇ ਨੂੰ ਮੇਰੇ ਪਹਿਰਾਵੇ ਨਾਲ ਠੇਸ ਪਹੁੰਚੀ ਹੈ ਤਾਂ ਮੈਂ ਅੱਗੇ ਤੋਂ ਐਸੇ ਕੱਪੜੇ ਨਹੀਂ ਪਹਿਨਾਂਗੀ। ਜੇ ਮੇਰੇ ਇਸ ਕਿਰਤ ਨਾਲ ਕਿਸੇ ਦੀ ਭਾਵਨਾ ਦੁਖੀ ਹੋਈ ਹੈ ਤਾਂ ਮੈਂ ਸਭ ਤੋਂ ਮਾਫ਼ੀ ਮੰਗਦੀ ਹਾਂ।”
ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਦੋਹਾਂ ਪੱਖਾਂ ਦੇ ਬਿਆਨ ਲਏ ਜਾ ਰਹੇ ਹਨ। ਮੋਹੱਲੇ ਵਿੱਚ ਇਸ ਘਟਨਾ ਤੋਂ ਬਾਅਦ ਲੋਕਾਂ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ ਅਤੇ ਸਥਾਨਕ ਪ੍ਰਸ਼ਾਸਨ ਤੋਂ ਸ਼ਾਂਤੀ ਬਣਾਈ ਰੱਖਣ ਦੀ ਮੰਗ ਕੀਤੀ ਜਾ ਰਹੀ ਹੈ।
