ਬਸਤੀਆਦ ਇਲਾਕੇ ਦੇ ਪਾਰਸ ਐਸਟੇਟ ‘ਚ ਘਰਾਂ ਦੀ ਨੀਂਹ ਬੈਠੀ, ਲੋਕਾਂ ਵਿਚ ਰੋਸ — ਡੀਲਰ ‘ਤੇ ਘਟੀਆ ਮਟੀਰੀਅਲ ਲਗਾਉਣ ਦੇ ਦੋਸ਼

ਜਲੰਧਰ :(ਕੰਵਲਜੀਤ ਸਿੰਘ ਮੱਕੜ) – ਜਲੰਧਰ ਦੇ ਬਸਤੀਆਦ ਇਲਾਕੇ ਦੀ 120 ਫੁੱਟੀ ਸੜਕ ‘ਤੇ ਸਥਿਤ ਪਾਰਸ ਐਸਟੇਟ ‘ਚ ਰਹਿ ਰਹੇ ਪਰਿਵਾਰਾਂ ਦੀਆਂ ਮੁਸ਼ਕਲਾਂ ਵੱਧਦੀਆਂ ਜਾ ਰਹੀਆਂ ਹਨ। ਇਥੇ ਗਲੀ ਨੰਬਰ 1 ‘ਚ ਕਈ ਘਰਾਂ ਦੀ ਨੀਂਹ ਬੈਠ ਗਈ ਹੈ ਤੇ ਕੰਧਾਂ ‘ਚ ਵੱਡੀਆਂ ਦਰਾਰਾਂ ਆ ਗਈਆਂ ਹਨ। ਇਸ ਘਟਨਾ ਨਾਲ ਇਲਾਕੇ ਦੇ ਰਹਿਣ ਵਾਲਿਆਂ ਵਿਚ ਕਾਫੀ ਰੋਸ ਪਾਇਆ ਜਾ ਰਿਹਾ ਹੈ।

ਇਕ ਪੀੜਤ ਔਰਤ ਨੇ ਦੱਸਿਆ ਕਿ ਉਸਨੇ ਸਿਰਫ਼ ਦੋ ਸਾਲ ਪਹਿਲਾਂ ਹੀ ਇਹ ਘਰ ਖਰੀਦਿਆ ਸੀ। ਘਰ ਲੈਣ ਤੋਂ ਕੇਵਲ ਦੋ ਮਹੀਨੇ ਬਾਅਦ ਹੀ ਟਾਇਲਾਂ ਹਿਲਣ ਤੇ ਹੇਠਾਂ ਬੈਠਣ ਲੱਗ ਪਈਆਂ। ਇਸ ਬਾਰੇ ਜਦੋਂ ਉਸਨੇ ਡੀਲਰ ਨੂੰ ਸੂਚਨਾ ਦਿੱਤੀ ਤਾਂ ਸ਼ੁਰੂ ‘ਚ ਉਹ ਕਈ ਵਾਰ ਆਇਆ, ਪਰ ਹੁਣ ਫੋਨ ਵੀ ਨਹੀਂ ਚੁੱਕਦਾ। ਔਰਤ ਨੇ ਦੱਸਿਆ ਕਿ ਘਰ ਦੀ ਜ਼ਮੀਨ ਲਗਾਤਾਰ ਬੈਠ ਰਹੀ ਹੈ ਜਿਸ ਕਾਰਨ ਉਹ ਮਨੋਵਿਗਿਆਨਕ ਤੌਰ ‘ਤੇ ਵੀ ਪਰੇਸ਼ਾਨ ਹੋ ਗਈ ਹੈ।

ਪੀੜਤ ਪਰਿਵਾਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇਹ ਘਰ ਖਰੀਦਣ ਲਈ 25 ਲੱਖ ਰੁਪਏ ਦਾ ਲੋਨ ਲਿਆ ਸੀ। ਇਸ ਤੋਂ ਪਹਿਲਾਂ ਉਹ ਮਿੱਟੂ ਬਸਤੀ ‘ਚ 35 ਸਾਲਾਂ ਤੋਂ ਕਿਰਾਏ ‘ਤੇ ਰਹਿ ਰਹੇ ਸਨ। ਪਾਰਸ ਐਸਟੇਟ ਵਿਚ ਨਵਾਂ ਘਰ ਖਰੀਦਣਾ ਉਨ੍ਹਾਂ ਦਾ ਸੁਪਨਾ ਸੀ, ਪਰ ਹੁਣ ਇਹੀ ਘਰ ਉਨ੍ਹਾਂ ਲਈ ਦੁੱਖ ਦਾ ਕਾਰਣ ਬਣ ਗਿਆ ਹੈ। ਪਰਿਵਾਰ ਨੇ ਕਿਹਾ ਕਿ ਉਹ ਘਰ ਨੂੰ ਦੋ ਤੋਂ ਤਿੰਨ ਵਾਰ ਰੀਪੇਅਰ ਕਰਵਾ ਚੁੱਕੇ ਹਨ, ਪਰ ਦਰਾਰਾਂ ਮੁੜ ਆ ਜਾਂਦੀਆਂ ਹਨ।

ਰਿਹਾਇਸ਼ੀਆਂ ਦਾ ਦੋਸ਼ ਹੈ ਕਿ ਡੀਲਰ ਨੇ ਘਰ ਬਣਾਉਣ ਸਮੇਂ ਘਟੀਆ ਮਟੀਰੀਅਲ ਵਰਤਿਆ ਹੈ, ਜਿਸ ਕਾਰਨ ਜ਼ਮੀਨ ਬੈਠ ਰਹੀ ਹੈ ਅਤੇ ਘਰਾਂ ਦੀ ਹਾਲਤ ਖਰਾਬ ਹੋ ਰਹੀ ਹੈ। ਪੜੋਸੀ ਵੀ ਇਸ ਸਮੱਸਿਆ ਨਾਲ ਪਰੇਸ਼ਾਨ ਹਨ ਅਤੇ ਉਨ੍ਹਾਂ ਦੇ ਘਰਾਂ ‘ਚ ਵੀ ਦਰਾਰਾਂ ਪੈਣ ਲੱਗੀਆਂ ਹਨ।

ਪੀੜਤ ਪਰਿਵਾਰ ਨੇ ਪ੍ਰਸ਼ਾਸਨ ਨੂੰ ਚੇਤਾਵਨੀ ਦਿੱਤੀ ਹੈ ਕਿ ਜੇ ਉਨ੍ਹਾਂ ਦੀ ਸੁਣਵਾਈ ਨਾ ਹੋਈ ਤਾਂ ਉਹ ਡੀਲਰ ਦੇ ਖਿਲਾਫ਼ ਸਰਕਾਰੀ ਤੌਰ ‘ਤੇ ਸ਼ਿਕਾਇਤ ਦਰਜ ਕਰਵਾਉਣਗੇ। ਉਨ੍ਹਾਂ ਦੀ ਮੰਗ ਹੈ ਕਿ ਡੀਲਰ ਘਰਾਂ ਨੂੰ ਠੀਕ ਕਰਵਾਏ ਅਤੇ ਉਨ੍ਹਾਂ ਨੂੰ ਸੁਰੱਖਿਅਤ ਰਿਹਾਇਸ਼ ਮੁਹੱਈਆ ਕਰਵਾਏ।